D'Ofschléissen vun engem Aarbechtsvertrag -2-

Marie:

Mir schwätzen also weider iwwert d'Form vum Aarbechtsvertrag. Wéi kann e Salarié dann e Kontrakt erzwéngen, wa kee geschriwwen ass?

Pier:

Wa kee schrëftleche Vertrag besteet, steet et dem Salarié zou, mat him iwwerloosse Moyen, an egal em wéi eng Zomme Suen et eventuell geet, esou e Vertrag nozeweisen.

Marie:

Majo wat geschitt dann, wann eng vun de Parteien de Vertrag NET wëll ënnerschreiwen?

Pier:

Wann eng Partei net ënnerschriwwen huet, kann déi aner Partei, fréistens 3 Deeg nodeems si dës Ënnerschrëft schrëftlech gefuerdert huet, awer spéitstens 30 Deeg no dem éischte Schaffdag, de Kontrakt ouni Préavis, also Virlafzäit an ouni Strof mussen ze bezuelen, kënnegen.

Marie:

Wéi eng Regele mussen dann agehale ginn, wann een Aarbechtsvertrag ofgeännert gëtt? 

Pier:

Ma hei komme mir op e Punkt zeréck, dee mir virun 14 Deeg schonn ugeschwat haten. Véier Saachen, déi am Kontrakt festgehale sinn, sinn als sougenannten "essentiell Klauselen" vum Kontrakt vun de Geriichter bezeechent, an zwar d'Aarbechtsplaz, d'Aarbechtsbeschreiwong, d'Aarbechtszäiten an natierlech de Salaire.
Wann ee vun dëse Punkten zum Nodeel vum Salarié ofgeännert gëtt, musse gewësse Modalitéiten agehale ginn. De Salarié muss des Änneronge mat deem gesetzleche Préavis schrëftlech matgedeelt kréien. An dësem Schrëftstéck steet dann och, ab wéini dës Ännerongen a Kraaft trieden. Gëtt dës Prozedur net agehalen, sinn dës eesäiteg beschlossen Ännerongen hifälleg.
Esou wéi bei enger Kënnegong vum Kontrakt, kann de Salarié d'Motiver (also d'Ursaachen) vun dësen Änneronge beim Patron ufroen. De Patron muss déi dann an deene vum Gesetz virgesinnen Délaien an an der richteger Form (also iwwert Recommandé oder accusé de réception) matdeelen.
Eng Ofännerong vun dem Vertrag wéint schwéierem Feeler (also motiv grave), ass dem Salarié an der Form an deene gesetzlechen Délaie matzedeelen, soss sinn dës Ännerongen och hifälleg.
Schliisslech gëtt eng Opléisong, also Kënnegong vum Kontrakt vu Säite vum Salarié als Suite vun esou Ännerongen als Kënnegong vu Säite vum Patron ugesinn a juristesch Schrëtt kënnen an deem Fall viru Geriicht ageleet ginn.